Monday, May 27, 2013

Ishq-e-butaan ka le ke sahaara kabhi kabhi - ‘Arsh’ Malsiayani



Ishq-e-butaan ka le ke sahaara kabhi kabhi,
Apne Khuda ko hum ne pukaara kabhi kabhi;

Aasooda-e-Khaatir hi naheen matmah-e-wafa,
Gham bhi kiya hai hum ne gawaara kabhi kabhi;

Is intehaa-e-tark-e-muhabbat ke ba-wajood,
Hum ne liya hai naam tumhaara kabhi kabhi;

Tufaan ka khauf hai abhi shayad karishma-kaar,
Aata hai samne jo kinaara kabhi kabhi,

Tanhaa-ravi ne rak’khi humaare junoon ki laaj,
Go ahl-e-kaarwan ne pukaara kabhi kabhi;

Ab kya kahein dil-e-mutalavvin-mizaaj ko,
Aksar ye aap ka hai,humaara kabhi kabhi;

Paiham sitam se ishq ki taskeen ho na jaaye,
Aye dost iltifaat Khudaa-ra kabhi kabhi;

Fariyaad-e-gham se ‘arsh’ sambhalta hai dil magar,
Lete hain ahl-e-dil ye sahaara kabhi kabhi..!!!

~ ‘Arsh’ Malsiayani

--------------------------------------------------------------------------
Aasooda-e-Khaatir = Khushaali ke liye
matmah-e-wafa = Wafa ki chaahat
dil-e-mutalavvin-mizaaj = Wo dil jiska mizaj humesha badalta ho
Paiham = Humesha, lagataar
Iltifaat = Rahem










5 comments:

  1. Very nice love poetry.
    I am sharing some of my favorite love poetry here.

    Nazar jab us se milti thi
    Men khud ko bhool jata tha.
    Bas ik dharrkan dharrakti thi
    Men DIL ko bhool jata tha.
    Ussay milney se pehley men boht sajta sanwrta tha.
    Magar jab wo sanwarti thi.
    Men khud ko bhool jata tha.
    Men aksar kitabon pr
    Usi ka nam likhta tha.
    Magar kuch wo jo likhti thi.
    Men likhna bhol jata tha.
    Men aksar hi ye kehta tha.
    Men tum se pyar krta hon.
    Mgr jab wo ye kehti thi.
    Me dunya bhol jata tha…!

    ReplyDelete
  2. Very nice Urdu poetry.
    I am sharing some of my favorite urdu poetry here.

    Wo kon tha jo mujhy aisy mila k koi gham na raha,
    Jo dour reh kr b mujsy dour na raha,

    Jany kab sy hamy uski talash thi.
    Jb btana chaha usy tou koi lafz na raha,

    Usy dakhny ki chah me nighahen tarsi hy meri
    Or jb nigha mili tou waqt hi na raha ,

    Lamha lamha uski yado me hi guzar jata hy.
    ….Sagar…..
    Wo tabir tou hy meri lekin ab koi khuwab na raha..!

    ReplyDelete