Haram aur dair ke katbey wo dekhey - ‘Seemab’ Akbarabadi

Haram aur dair ke katbey wo dekhey jis ko fursat hai,
Yahaan hadd-e-nazar tak sirf unwaan-e-muhabbat hai;

 Parastaar-e-muhabbat ki muhabbat hi shariyat hai,
Kisi ko yaad kar ke aah kar lenaa ibaadat hai;

Ho ek kiradaar tum bhi merey mamool-e-muhabbat ka,
Mujhe tumse nahin apni muhabbat se muhabbat hai;

Wo kya sajda ? rahe ehsaas jismein sar uthaane ka,
Ibaadat aur ba-qaid-e-hosh tauheen-e-ibaadat hai;

 Meri dewaangi pe hosh waale bahas farmaaein,
Magar pahle unhein deewana ban’ne ki zaroorat hai;

 Maqaam-e-ishq ko har aadmi ‘seemab’ kya samjhe,
Ye hai ek martabaa, jo maawara-e-aadmiyat hai..!!!


~ Hazrat ‘Seemab’ Akbarabadi Sahab

Sajda kar ke qadam-e-yaar pe qurbaan hona - ‘Wamiq’ Jaunpuri Sahab

Sajda kar ke qadam-e-yaar pe qurbaan hona,

Yun likha tha meri kismat mein musalmaan hona;

 

Jiska mazhab ho faqat yaad-e-sanam deed-e-sanam,

Wo nahin jaanta kaafir ya musalmaan hona;

 

Husn ko poojna aur jaam-e-muhabbat peena,

Mashrab-e-ishq mein yun sahib-e-imaan hona;

 

Maqtab-e-ishq mein ‘Wamiq’ ne ya paai taleem

Ain-e-imaan hai fida-e-rukh-e-janaan hona....!!!!

 

~ Hazrat ‘Wamiq’ Jaunpuri Sahab

Un aankhon ka aalam, ghulabi ghulabi - Hazrat Behzad Lakhnavi

Un aankhon ka aalam, ghulabi ghulabi

Merey dil ka aalam, sharabi sharabi

 Nigahon ne dekhi, muhabbat ne maani

Teri bemisali, teri lajawaabi

 Ye duz-deeda nazarein, ye raftaar-e-naazuk
Inheen ke badaulat hui hai kharabi

Khuda ke liye apni nazron ko roko
Tamanna bani ja rahi hai jawabi

Hai “Behzad” unki nigah-e-karam par
Meri na-muradi meri kaamayabi

 

~ Hazrat ‘Behzad’ Lucknawi Niyazi R.A.

jab aankh khuli to kuch na dekha hum ne - Khwaja 'Mir' Dard

Beenai na thi to dekhte the sab kuch

jab aankh khuli to kuch na dekha hum ne

~ Hazrat Khwaja 'Mir' Dard

English Translation:

Without true vision we thought everything is real

After enlightenment we found the world is illusionary 

Naqsh-e-soorat ko mita - Khwaja Haider Ali Aatish

Naqsh-e-soorat ko mita, aashna maani ka ho

Qatra bhi dariya hai jo dariya mein shamil ho gaya....

~ Hazrat Khwaja Haider Ali Aatish

English Translation:

Forget the features and appearances, seek the meaning instead

A drop that merges in the river, is a river itself

Ya mujhe afsar-e-shahaana banaaya hota - Hazrat Bahadur Shah ‘Zafar’

Ya mujhe afsar-e-shahaana banaaya hota

Ya mera taaj gadayana banaaya hota

Apna deewana banaya mujhe hota tu ne

Kyun khirad mand banaaya, na banaaya hota

Khaksaari ke liye gar che banaaya tha mujhe

Kaash !!! sang-e-dar-e-janaana banaay hota

Nash’aa-e-ishq ka gar zarf diya tha mujh ko

Umr ka tang na paimaana banaaya hota

Dil-e-sad chaak banaaya, to balaa se, lekin

Zulf-e-mushkeen ka teri shaana banaaya hota

Soofiyon ke jo na tha laayaq-e-sohbat to mujhe

Qaabil-e-jalsa-e-rindaana banaay hota

Tha jalaana hi agar doori-e-saaqi se mujhe

To charaagh-e-dar-e-janaana banaaya hota

Roz maamoora-e-duniyaa mein kharaabi hai ‘Zafar’

Aisi basti se to weerana banaaya hota

~ Hazrat Bahadur Shah ‘Zafar’

Dil hai mera maqaam-e-gham - Akhtar Sheerani

Dil hai mera maqaam-e-gham, gham ka maqaam hai yahaan

Naa’la-e-subah hai yahaan, giriyaa-e-shaam hai yahaan

Ek tasawwur-e-haseen khilwat-e-dil mein hai makeen

Deeda-e-shauq ke liye deed haraam hai yahaan

Nikhat-e-noor-o-naar udhar, zulmat-o-soz-o-saaz idhar

Subah hi subah hai wahaan, shaam hi shaam hai yahaan

Sahan-e-chaman mein har jagah nash’sha sa failne lagaa

Aaj yah kaun mahalaqaa mast-e-khiraam hai yahaan

Mera alam’kada nahin rang-e-tarab se aashna 

fasl-e-khijaan ho ya bahaar, maatam-e-aam hai yahaan

Unke liye suroor-e-naaz, mere liye gham-o-gudaaz 

Gardish-e-chashm hai wahaan, gardish-e-jaam hai yahaan

~ Akhtar Sheerani

Hijaab-e-rukh-e-yaar the aap hi hum - Hazrat Khwaja 'Mir' Dard

Hijaab-e-rukh-e-yaar the aap hi hum

Khuli aankh jab koi parda na dekha

~Hazrat Khwaja 'Mir' Dard

English Translation:

Only we were the veil of the face of the beloved

When the eyes opened we didn't find any veil

Kafir-e-ishq hoon main banda-e-islam nahin - Hazrat Qibla Shah Niyaz Beniyaz R.A.

Kafir-e-ishq hoon main banda-e-islam nahin

But parasti ke siwa aur mujhe kaam nahin

Ishq mein poojta hoon qibla-o- kaaba apna

Ek pal dil ko mere uske bin aaraam nahin

Bulhawas paanw na rakhiyo kabhi is raah ke beech

Koocha-e-ishq hai ye raguzar-e-aam nahin

Haye re haye chali jaati hai yun fasl-e-bahaar

Kya karoon bas nahin apna wo sanam ram nahin

Aar kya hai tujhe duniya ki malaamat se ‘Niyaz’

Aashiqon mein tuu akelaa hi to badnaam nahin 

~ Hazrat Qibla Shah Niyaz Beniyaz R.A.

Ek pal mein ek sadi ka mazaa hum se poochhiye ~ Janaab "Khumaar" Barabanki Sahab !!!!!

Ek pal mein ek sadi ka mazaa hum se poochhiye

Do din ki zindagi ka mazaa hum se poochhiye

Bhooley hain raftaa-raftaa unhein muddatton mein hum

Qishton mein Khud-kushi ka mazaa hum se poochhiye

Aghaaz-e-aashiqi ka mazaa aap jaaniye

Anjaam-e-aashiqi ka mazaa hum se poochhiye

Jalte diyon mein jalte gharon jaise zau kahaan

Sarkaar raushni ka mazaa hum se poochhiye

Wo jaan hi gaye ki humein un se pyaar hai

Aankhon ki mukhbari ka mazaa hum se poochhiye

Hasne ka shauq hum ko bhi tha aap ki tarah

Hansiye magar hansi ka mazaa hum se poochhiye

Hum tauba kar ke mar gaye qabl-e-azal "Khumaar"

Tauheen-e-maikashi ka mazaa hum se poochhiye !!!

~ Janaab "Khumaar" Barabanki Sahab !!!!!

Nau-bahaar ast-o-gul-o-mausam-e-eid aye saqi - Hazrat Amir Khusro

Nau-bahaar ast-o-gul-o-mausam-e-eid aye saqi

Baada-nosh-o-guzaar az waada-o-wa-eid aye saqi

(Eid hai, mausam-e-gul ki faza hai aye saqi

Chord ye waade, utha jaam, pilaa aye saqi)

Hasil az umr nadaarad bajuz az hasrat-e-dard

Har ke eid ast ze maikhaana baeed aye saqi

(Terey maikhane se kya us ko milaa aye saqi

Eid ke roz bhi jo pee na saka aye saqi)

Gasht paimaana choon tasbeeh rawaan dar kaf-e-shaikh

Ta ze laa’la to yak jurr’aa chasheed aye saqi

(Shaikh ke haath mein hai soorat-e-tasbeeh rawaan

Terey lab ne usey kya jaam diya hai saaqi)

Roz-e-mahshar nabood haich hisaabash bayqeen

Hark e dar koi mughaan ghasht shaheed aye saqi

(Kya ajaab aur sawaab us ke liye roz-e-hisaab

Wo jo maikhaaney mein jaan de ke utha aye saqi)

Baaraha karda ba-dam tauba zamee baaz maraa

Chashm-e-mast to maikhana kaseed aye saqi

(Kar ke tauba main chala aaya tha maikhane mein
Terey mast aankhon ne phir kheench liya aye saqi)

~  ‘Tooti-e-Hind’ Hazrat Amir Khusro Dehalvi Chishti Nizami R.A.

Ye ishq ne dekha hai ye aql se pinhaan hai - Asghar Gondvi

~Ye ishq ne dekha hai, ye aql se pinhaan hai~

Ye ishq ne dekha hai, ye aql se pinhaan hai
Qatre mein samandar hai, zar’re mein bayaabaan hai

Hai ishq, ki mahshar mein yun mast-o-khiramaan hai
Dozakh baghareebaan hai, firdaus badaamaan hai

Hai ishq, ki shorish se ra’naai-o-zebaai
Jo khoon uchhalta hai wo rang-e-ghulistaan hai

Phir garm nawaazish hai zu-mehr darakhshaan ki
Phir qatra-e-shabanam mein hangaama-e-toofaan hai

Aye paikar-e-mehboobi main kis se tujhe dekhoon
Jis ne tujhe dekha hai wo deeda-e-hairaan hai

Sau baar tera daaman haathon mein mere aaya
Jab aankh khuli, dekha, apana hi girebaan hai

Ik shorish be-haasil, ik aatish be-pardaa
Aafat kada-e-dil mein ab kufr hai na imaan hai

Dhoka hai ye nazron ka, ye bazeecha hai lazzat ka
Jo guncha qafas mein tha, wo asal ghulistaan hai

Ik guncha-e-afsurda,ye dil ki haqeeqat thi
Ye mauj zani khoon ki, rangeeni-e-paikaan hai

Ye husn ki maujein hain ya josh-e-tamanna hai
Us shokh ke honthon par ek barq si larzaan hai

'Asghar' se miley lekin 'Asghar' ko naheen dekha
Ashaar mein sunte hain kuch-kuch wo numayaan hai

~ Janab ‘Asghar’ Gondvi Sahab

Mohabbat karne wale gham se ghabraaya nahin kerte !!!!

M’aaz-Allah tasawwur mein bhi wo aaya nahin karte 
Dil-e-mahzoon ko sham-e-gham bhi samjhaaya nahin karte

Guzishta waardat-e-ishq duhraaya nahin kerte 

Shikaayat kya labon tak aah bhi laaya nahin karte 

Mohabbat karne wale gham se ghabraaya nahin kerte.....

Ye behr-e-kaif-o-masti hai yahan be-wasta bahna
Ye duniya-e-muhabbat hai yahan ka hashr kya kahna

Ye hoshiyaron ki mahfil hai yahan kuch soch ker kahna

Ye bazm-e-saghar-o-meena hai waaiz hosh mein rehna 

Yahan be-kaif afsaanon ko dohraaya nahin karte.....

Jinhein gham ki fazaaein bakhsh dein irfaan-e-sermasti 

Jinhein unki adaaein bakhsh dein irfaan-e-sarmasti

Jinhein paiham jafaein bakhsh dein irfaan-e sar-masti

Jinhein unki nighahein bakhsh dein irfan-e sar-masti

Wo deewane fareb-e-hosh mein ayaa nahin kerte.....

Terey qadmon pe sar rakhna meri daireena fitrat hai

Yahi meri aqedat hai yahi meri mohabbat hai

Dil-e-dard-aashna ulfat mein ye takmeel-e-ulfat hai

Haram ho dair ho kuchh bhi ho lekin ye haqeeqat hai 

Khuloos-e-dil ke sajde raayegaan jaaya nahin kerte.....

Raah-e-ulfat mein hota hai taqaaza ab ye khilwat ka

Aur gumaan hone laga soorat pe apni, unki soorat ka 

Azeez-e-Waarsi ye sheir hai pukhta aqeedat ka 

‘Asad’ mauqa miley to kya miley arz-e-mohabbat ka

Hum un ko paa ke apne aap ko payaa nahin kerte.....

Nazar milaa na sake us se us nigaah ke baad - Krishan Bihari Noor Sahab

Nazar milaa na sake us se us nigaah ke baad 
Wahi hai haal humaara jo ho gunaah ke baad

Main kaise aur kisi simt modta khud ko 

Kisi ki chaah na thi dil mein teri chaah ke baad

Zameer kaanp to jataa hai aap kuchh bhi kahein 

Wo ho gunaah se pahale ke ho gunaah ke baad

kati hui theen tanaabein tamaam rishton ki 

Chhupaata sar main kahaan tujhse rasm-o-raah ke baad

Gawaah chaah rahe the wo begunaahi ka 

Zubaan se kah na saka kuchh "Khuda-gawaah" ke baad 

Khutoot kar diye waapas, magar meri neendein

Inhein bhi chhor do ik raham ki nigaah ke baad 

~ Krishan Bihari Noor Sahab

Guru darshan Bhagwaan ka darshan !!!!

Guru darshan Bhagwaan ka darshan, Sift mein zaat samaai re
Guru bin gyaan naheen bhai saadho, Guru ne baat bataai re

Guru-Ishwar mein farq na jaano, Guru Ishwar ka ayen pahchaano

Guru soorat Bhagwaan ki soorat, Guru ne jaan karaai re

Har dam dhyaan guru mein rakhna, Sar ko rakhna charnon mein

Guru kirpa ka pee kar amrit, qalb ki hogi safaai re 

Guru ka jaap jape ja hardam, Raam jape phir jaap tera

Karta ja Guru ki sewa, Pooje tohe Khudaai re

Tumhare dar pe sada kham sar-e-niyaz rahe......

Tumhare dar pe sada kham sar-e-niyaz rahe

Namaz-e-ishq ka ye silsila daraaz rahe

Sar-e-niyaz ka kya hai raha, raha na raha

Khuda kare ke tera aastaan-e-naaz rahe

Wo sar hi kya ke na ho jis pe ishq ka sauda

Wo dil hi kya ke ulfat se beniyaaz rahe

Maza isi mein hai aashiq ko zindagaani ka

Kisi ki yaad rahe aur aah jaan gudaaz rahe

Fareb-e-husn ke parde jo darmiyaan se uthe

Niyaz-o-naaz mein kuchh bhi na imtiyaaz rahe

Yahi hai haasil-e-ulfat, yahi hai maa’na-e-ishq

Niyazmand rahoon main, wo beniyaaz rahe !!!!!!

Paas aatey hain merey aur na bulatey hain mujhe - Hazrat Kamil Hyderabadi

Paas aatey hain merey aur na bulatey hain mujhe

Ye bhi kya kam hai ke wo yaad to aatey hain mujhe

Daayam abaad rahey yun hi bhari bazm unki

Ban ke khud shamm’aa jo parwaana banaatey hain mujhe

Sadqa husn-e-nazar hai meri masti saari

Unke qurbaan jo aankhon se pilaatey hain mujhe

Meri kya bood hai sab unka wajood unka namood

Kaise nadaan hain jo saamney laatey hain mujhe

Jaante hain ke nahin unke siwa koi meraa

Kuchh samajh kar ke hi daaman mein chhupaatey hain mujhe

Kahiye kis khusrawe khooban ki aamad ‘Kamil’

Roonumaai mein do aalam nazar aatey hain mujhe

~ Hazrat ‘Kamil’ Hyderabadi

Apna to nahin yaar main kuchh, yaar hoon tera - Khwaja Mir 'Dard'

Apna to nahin yaar main kuchh, yaar hoon tera

Tu jis ki taraf howey, tarafdaar hoon tera

Kurhne pe mere jee na kurha, teri balaa se

Apna to nahin gham mujhe, ghamkhwaar hoon tera

Tu chaahe na chaahe mujhe kuchh kaam nahin hai

Azaad hoon is se bhi, giraftaar hoon tera

Tu howey jahaan, mujh ko bhi hona waheen laazim

Tu gul hai meri jaan to, main khaar hoon tera

Hai ishq se mere hi tere husn ka shahra

Main kuchh nahin par, garmi-e-bazaar hoon tera

Meri bhi taraf tu kabhi aa jaa mere Yusuf

Burhiya ki tarah main bhi khareedar hoon tera

Aye ‘Dard’ mujhe kuchh naheen ab aur to azaar

Us chasm se kah dena ki bimaar hoon tera

~ Hazrat Khwaja Mir ‘Dard’

Main khud ko dhoondhta hoon - Hazrat Syed Ghaosi Shah R.A.

Main khud ko dhoondhta hoon, Wo haath aa rahe hain

Ab meri shaql se wo, jalwe dikha rahe hain

Main wo nahin hoon hargiz, wo main nahin hain lekin

Wo mujh ko munh kar ke, khud ko bataa rahey hain

Main unka aaina hoon, wo mera aaina hain

Main unhein dikhaa rahaa hoon, wo mujhe dikhaa rahey hain

Main, main nahin rahaa ab, ab wo hi main baney hain

Har aan ab wo mujh mein, main ban ke aa rahey hain

Aye waa-e-Hazrat-e-ishq achchhe hain ye karishmein

Arey jitna mujhe bigaada, utna banaa rahey hain

Mai mein kahaan thi masti, itni ke mujh ko khoti

In aakhon ke main sadqe, bekhud banaa rahey hain

Taalib se lan-taraani aakhir chali na unki

Kah kar wal-aakhir-unzur parde utha rahey hain

Main kya bataaun ‘Ghausi’ main kaisa mit gayaa hoon

Khud ko tatolta hoon, wo haath aa rahey hain

~ Az Hazrat Syed Ghousi Shah R.A.,Hyderabad

Muhabbat mein shab-e-tareek-e-hijraan kaun dekhega - Makhmoor Dehalvi

Muhabbat mein shab-e-tareek-e-hijraan kaun dekhega ????
Humeen dekheinge, yah khwab-e-parishaan kaun dekhega ????


In aankhon se tajalli ko darakhshaan kaun dekhega ????
Utha bhi do naqaab-e-ru-e-tabaan kaun dekhega ????


Yahi ik raat hai bas kaaynaat-e-zindagi apni
Sahar hoti hui  aye shaam-e-hijraan kaun dekhega ????


Basaana hi badega ik na ik din khana-e-dil ko
Bane firte ho Yusuf, sham-e-zindaan kaun dekhega ????

Haqeeqat ka takaaza bhi yahi hai pardadaari ka
raho tum aankh mein ke pardon mein pinhaan, kaun dekhega ????


Kuchh aisa ho dam-e-aakhir na aaein ayaadat ko
Unhein apne kiye par yun pashemaan kaun dekhega ????


Mujh par aayega ilzaam meri paaymaali ka
Teri raftaar ko aye fitna samaan kaun dekhega ????


Yahi ab bhi sadaaein aati hain waadi-e-aiman se
Kahaan hain taalib-e-deedar-e-janaan, kaun dekhega ????

Azaab-e-hashr se tu kyun daraata hai mujhe waaiz
Tujhe maloom bhi hai, fard-e-isiyaan kaun dekhega ????


Chalo ‘makhmoor’ tanhaai mein shagl-e-maikashi hoga
Chhupa kar le chalo peene ka saaman kaun dekhega ????

~ Makhmoor Dehalvi

Sazaa-e-husn-e-paraasti - Firaq Gorakhpuri

 Sazaa-e-husn-e-paraasti bajaa, bajaa bhi nahin
Ki jurm-e-ishq butaan hai buraa, buraa bhi nahin

Kisi ko kya na milaa zindagi mein waa-e-naseeb
Humaare haath bas ik dil rahaa, rahaa bhi nahin

Udhar qadam bhi uthaanye de bad-dimaagi-e-ishq
Hum aison par dar-e-Jannat khulaa, khulaa bhi nahin

Nazar farebi-e-tahreer le udi mujhko

Sirey se naama-e-jaanan padha, padha bhi nahin

Tamaam shokhi-e-raftaar teri raahguzar
Qadam ka naksh kuchh aisa utha, utha bhi nahin

Wo jaise hai hi nahin is adaa se saamne hai
Agar kahoon ki mujhse khafa, khafa bhi nahin

Hum usko dekh ke bhi aah kis tarah dekhein
Nazaara-e-rukh-e-jaanan hua, hua bhi nahin

Nigaah-e-naaz se sun ke dil udaas hua
Agar kahein ke kuchh usne kahaa, kahaa bhi nahin

Jamaan-maqaan ka ye parda hijaab-e-aqbar hai
Hazaar baar ye parda utha, utha bhi nahin

Bas ik nigaah ki parchhiyaan baqaa-o-fanaa
Baqaa, Baqaa bhi nahin hai, fanaa, fanaa bhi nahin

Jisye muaamla-e-husn-o-ishq kahte hain
Hazaar baar ye jhagda chukaa, chukaa bhi nahin

Wo aankh kahti hai aisye ka kya thikaana hai ???
‘Firaq’ aadmi to hai bhalaa, bhalaa bhi nahin

             ~ Raghupati Sahaay ‘Firaq’ Gorakhpuri